1Cor 3 | APZ | STEP | Nje a'amu soku, hohonta ngko sekwo'nji nohumanji Anɨtuye hungkuno selɨmentoheso ngko a'amu Anɨtuye Towahuno Wopɨngo hi'njo somo ulɨwo'nɨngkohe pa'nyoso sekumo hungkuno maselɨmmentohefoho. O'o, ngko a'amu hofɨko sɨmeho sohwo yo'mayo wonyoso umo lonte somo inɨngkawowo'nɨngkohofo pa'nyo sokumo Anɨtuye hungkuno selɨmentohefoho. Oso hohosohonta sekwo Kɨlaisɨye yahino somne'no mehomi milongo pa'nyo humamentohofofoho.

1 Corinthians 3

Anɨtuye a'amu ne somo mokosyohumawo'nɨngkohofo sohwa hofɨko Anɨtuye syoho ulohofiyo hwafoho.

1 Nje a'amu soku, hohonta ngko sekwo'nji nohumanji Anɨtuye hungkuno selɨmentoheso ngko a'amu Anɨtuye Towahuno Wopɨngo hi'njo somo ulɨwo'nɨngkohe pa'nyoso sekumo hungkuno maselɨmmentohefoho. O'o, ngko a'amu hofɨko sɨmeho sohwo yo'mayo wonyoso umo lonte somo inɨngkawowo'nɨngkohofo pa'nyo sokumo Anɨtuye hungkuno selɨmentohefoho. Oso hohosohonta sekwo Kɨlaisɨye yahino somne'no mehomi milongo pa'nyo humamentohofofoho. 2 Anɨtuye hungkuno neso tongo u wopayo yokumpohn'nyo pa'nyofoho. I sekwo mehomi milongo pa'nyo soku nohumentanɨngkofi ngko amno mijo'nohini sejapmmentohefoho. Anɨtuye hungkuno fehohnjoso tongo pa'nyoso sekwo manɨmmentohofofoho. I olohonta hohonta sekwo manɨfitnnehofo. 3 Hwapɨngoso sekwo Anɨtuye Towahuno ane pa'nyo soku ne'no humalofo. I nom'ne a'amu sekwo'nji humalofo somne'no sɨmeho tohino'nji uyontɨfi yoka hnnɨwo'nɨngkohofo kuyoho. Oso yahino sekwo iwo'nɨngkohofoso sekwoe sɨmeho sohwo kako yo'mayo wonyo umo lonte somnohini inɨngkawowo'nɨngkohofo kuyoho. Oso yahino hiso hwahoponta'angofoho. 4 Yahino anga'no yalokwofoso olenoho. A'amu anga'nohino sohwo kako ole lalofoho, Ngko Poulɨye a'amu hwo'nyoho. I nom'nihwo kako ole lalofoho, Ngko Apoulousɨye a'amu hwo'nyoho. Oso yahino hiso Anɨtu kakoe Towahunofe yahinotaho. O'o, awonoho. Hwahoponta'ango'nohinofoho.

5 Oso'no sekwo huno nto'no fɨsyafɨhupmno. Apoulous sohwo kako peho hwolo. I ngko Poul sohwo'ni peho hwo'nto. Nekwo sohwoya'i Anɨtuye syoho ulohofiyo hwoya'yoho. I oso'no nekwo Anɨtuye hungkuno wopɨngoso selahonɨngkuhwoi sekwo nupa'nontɨfi Anɨtumo sɨmeho hi'ntnnono uyɨmentohofofoho. Oso'no nakwoe Hwe Engo kako nekumo syoho anga'no anga'no ejopalofoho. 6 Ihwoni. Ngko sekwoe sɨmeho mo'mo Anɨtuye hungkuno ipisayo uyo hulohofo hopa hulasehumentohefoho. Apoulous kako oso ipisayo uyo homo somjo hoja wonyo yo'mayo sofokafonte somo wae yaofahonɨngki Anɨtu kako oso ipisayo homo somo hwapɨngo sohwo kako engo imokalofoho. 7 I a'amu kako ipisayo uyo hiso hulɨwo'nɨngkiso sohwo kako kakoe yofeso engo'maho. Yofe we'e'njo hweho. U a'amu kako hoja wonyo yo'mayo sofokafonte somo wae yaofɨwo'nɨngkiso sohwo kako kakoe yofe hi we'e'njo hweho. Anɨtu kako oso ipisayo uyo homo somo ne imokalokunjo sohwo kako oso hwo'nohini kako yofe engo hi'njo hweho. 8 Oso a'amu kako ipisayo uyo hulalokuso sohwo'nji hoja wonyo wae yaofalokuso sohwo'nji sikoe syoho neso afafoho. I oso'no siko sikoe syoho sikoepi sikoepi yalokusiyo so'no sikoe syoho homo somne'no ho'yango womanjiyoho. 9 Ou, Apoulousɨ'nji nekwo Anɨtuye syoho ulohofiyo hwoya'yoho. Sekwo soku Anɨtuye syoho kuyoho. Oso'no sekwo husilo husilofo peho'no loho'mentohofoto.

A'amu Anɨtuye syoho'njo sohwo kako ango molɨhwo'nɨngkiso pa'nyo hweho.

Sekwo Anɨtuye ango pa'nyo soku Anɨtu kako ango hiso molalofoho. 10 Anɨtu kako ngkimo wopɨngo ntohofonto kako kakoe syoho wopɨngo ntapmmentisoso yonji ngko ango ingkuso sɨmo'mjo hwo'nyoho. Oso'no ngko Anɨtuye hungkuno selɨmentohe sohonta oso hwosaho yokumpohn'nyoso nto iju'mo'mentohefoho. U a'amu nom'ne sohwa hofɨko Anɨtuye hungkuno losetɨhwalokwofo sohwa hofɨko oso hwosaho hopo sopo ango neso molalokwofo. A'amu huhwo sohwa hofɨko oso ango hiso wonyo imo'nonoho lɨkuji hofɨko huno nto'no wasyofɨhupɨfe. 11 I oso'no sekwo huno seyohoho. Oso hwosaho ngko sɨmo'mjo iju'mo'mentoheso Jisas Kɨlaisɨyoho. Oso hwosaho homo somo a'amu nom'nehwo kako yofafɨhwosi kako nom'ne hwosahoso momawonjonehoho. O'o, awonoho. 12 A'amu fihwo kako oso hwosaho hopo sopo ango wamolɨmo lɨhwosɨ'manji kako oso hwosaho hopo sopo nano yokumpohn'nyoso nomahwosi syasyososo oso nano huhwo sohwo kako ango yokino homo somo yokumpohn'nyo wokemokosyohumamontonoho. I yo'mayo holayo yokino, sɨngkume yokino oso nano po'nɨfoso kako nomahwosi mtitofasyososo yokumpohn'nyo mokemokosyohumanehoho. 13 I nakwo a'amu hopi'nonohino hn'nwi olo syoho yalokuhwone hiloso hwangku sohonta utɨhwa'nyopo u'mofapmmontonoho. Oso sɨkuno Jisas Kɨlais kako nakwoe hungkuno ikwolofo'ne somo asomo pososohonta yo'mayo syoho iwo'nɨngkuhwone somo toho hopa nonefoho. Oso toho hiso nɨngkahonɨngkuhwosi nakwo yo'mayo syoho iwo'nɨngkuhwone somo yamofo nalohofɨhwoso'no nakwo a'amu anga'no anga'nohino hn'nwiye syoho ne so'no huno wonayono. 14 U hwe fihwo kako ango oso hwosaho hopo sopo hofiyo'no moloso'manji oso kakoe ango homo somo toho manonehoho. O'o, awonoho. Oso ango hiso toho manyo'njo nto'no molohinowentanɨngkuhwosi oso syoho iyo huhwo sohwo kako ho'yango woma'mtonoho. 15 U hwe fihwo kako oso hwosaho hopo sopo kako ango nto'no mamojo'njo yoso sohwoe angoso toho nɨngkuhwosi kakoe syoho hopi'nonohinoso wonyo umo'nɨmontonoho. Syoho hiso ne ane umo'nɨmontonoho. U oso syoho iyo huhwo sohwo kako ho'yangoso momanehoho. Oso hwe huhwo sohwo kako songo ko humaso sohwo kako toho mta'ni ifɨwo'nɨngkohofo pa'nyo hweho.

Anɨtuye a'amu neso hofɨko Anɨtuye angofoho.

16 Olo so'no sekwo inɨngo seyɨhwoloho. Sekwo Anɨtuye a'amu ne soku Anɨtu kakoe ango kuyoho. Anɨtu kakoe Towahunoso sekwoe sɨmeho ajwomo'mo humaho. 17 U hwe fihwo kako sekwo Anɨtuye ango sokumo kako wonyo semokoso sohumo u, osohumo Anɨtu kako kakimo oso wonyo hiso aku uyɨmontonoho. Wayo weeo'mtonoho. I hwapɨngoso sekwoe sɨmehoso Anɨtuye ango wopɨngo'nohiniponoho.

Sekwoe yo'mayo hwahoponjofe yofeso noho'nomafɨkutoho. O'o, Anɨtuye yofe'nohini foho'nomapmno.

18 A'amu yo'mayo hwahoponjo so'no huno'njo somo Anɨtu kako uhwononteso hofɨkoe huno neso nɨhu'no ane kuyoho ulɨwo'nɨngkisofoho. Hohonta hwe fihwo Joup kako Anɨtuye hungkuno mtɨ'mokumentiso sohwo ole mtɨ'mokumento,

A'amu olo hwaho loponjo huno somnohini inɨngkawowo'nɨngkohofo somo oso huno ne ane huhwo sohwo hofɨkimo nano mokojɨlɨpemawo'nɨngkohoho.
Joup ose mtɨ'mokumentisofoho. Hwe nom'ne Anɨtuye hungkuno mtɨ'mokumentiso sohwo ole mtɨ'mokumento,

Anɨtu kako a'amu olo hwaho loponjo yo'mayo yo'mayo so'no huno'njo sohwafe hunomo uhwononteso hofɨkoe hunoso ne anefoho. Ose lɨwo'nɨngkisofoho.
Hungkuno ose mtɨ'mokumentisofoho. U, hwe fihwo kako hwasyo hungkuno hnnonoho. A'amu fihwo kako sekwo'njo sopo humaso sohwo kako olo hwaho loponjo yo'mayo somo inɨngkawowo'nɨngkiso sohwo ngko yo'mayo so'no huno'njo hwo'nyoho. Ose lɨwo'nɨngkiso sohwo kako yo'mayo hwahoponjo wonyo so'no hohujo ikinjaofɨhwosi kako Anɨtuye hungkuno ne'njoso womano. Oso huno wopɨngo hiso nomahonɨngkuhwosi a'amu fehohnjoso hofɨko nuhwonɨngkuji ole ulantɨfeho. Kako ilo'nnyohwo imo'nɨngkohoho. Ose ko ulɨfijoso oso hwe huhwo sohumo Anɨtu kako nuhwonɨngkuhwosi hwe sohwo walɨmontono oso huno'njo nto imo'nɨngkohoho walɨmontonoho. 21 Sekwo nakwo a'amu hwahoponjo hn'nyumo nenɨngkapɨkuji sekwo husilo husilofo ihwatɨmo'nɨngkutoho. U sekwo a'amufe yofe noho'nomafɨkutoho. Yo'mayo Anɨtu mtɨ'mokumentisoso sekwo'nefoho. 22 I hwapɨngoso sekwo Kɨlaisɨye kuyoho. I Kɨlais kako Anɨtuye hweho. Nakwo a'amu hufa'u sɨhune ngko Poulɨ'nyo Apoulousɨyo Pitayo oso hwona'ni nakwo sekumo sefo'mayo'ne hwona'ni humalohwono. Olo hwaho lopo yo'mayo Anɨtu ho'nahumentisoso sekwo'nefoho. Anɨtu kako songo humayo'ne sejapmmentisoso sekwo wopɨngo humayo'ne sejapmmentisofoho. Poyo pe'nyo sejapmmentisoso sekwo ango songo ne'no humayo sopo tɨpɨhwonyo'ne sejapmmentisofoho. Yo'mayo hopi'nono olohonta wojo so'nji tɨfi no'mo imo'none so'nji Anɨtu kako sekumo sefo'mayo'ne sejopalofoho.